ئێوەش دەتوانن بابەتەكانتان لە ڕێگەی ئەم پەیجی فەیسبووكەوە بنێرن.
Facebook.com/ZhingaParezan

وانه‌ی ژینگه‌پارێزی له‌ به‌رنامه‌ی خوێندندا

٨١% ی به‌شداربووانی راپرسیه‌ک له‌گه‌ڵ وانه‌ی ژینگه‌پارێزین له‌ به‌رنامه‌ی خوێندندا
سه‌ره‌ڕای ئه‌و مه‌ترسیه‌ زۆرانه‌ی رووبه‌رووی ژینگه‌ ده‌بنه‌وه‌، به‌ڵام وه‌ک پێویست ئه‌م بابه‌ته‌ گرنگی پێنادرێت و بۆ زیاتر گرنگیدان به‌ ژینگه‌ زۆرینه‌ی به‌شداربوانی راپرسیه‌ک پێیان باشه‌ وانه‌ی ژینگه‌ بکرێت به‌ وانه‌یه‌کی سه‌ره‌کی له‌ به‌رنامه‌ی خوێندندا.
ئاماده‌یى ئاسۆى میللى سویدى، که‌ خوێندنگه‌یه‌کى تایبه‌ته‌ له‌ شار سلێمانى، یه‌کێک له‌و وانانه‌ى که‌ له‌م خوێندنگایه‌ ده‌خوێندرێت, ژینگه‌ پارێزییه‌ و نمره‌ى خوێنکاره‌کانیش بۆ ئه‌م وانه‌یه‌ له‌ سه‌ر چالاکیه‌ جۆراوجۆری وه‌ک هه‌ڵمه‌تى پاکردنه‌وه‌، نه‌مام چاندن، کارکردن له‌ سه‌ر دروستکردنى فیلمى دیکۆمێنتى و ئه‌نجامدانى ڕاپرسیه‌ک ده‌بێت. ئه‌وه‌ى جێى تێڕامان بوو ڕاپرسیه‌که‌یان بوو له‌ سه‌ر ژینگه‌ که‌ له‌ لایه‌ن خوێندکارانه‌وه‌ ئه‌نجامدرا.
بۆ ئه‌م کاره‌یان چاوپێکه‌تنیان له‌گه‌ڵ (200) که‌سدا ئه‌نجامداوه‌ له‌ چه‌ند جێگه‌یه‌کى جیاوازى شارى سلێمانى. ئه‌نجامه‌که‌شى به‌م شێوه‌یه‌: له‌ وه‌ڵامی پرسیارێکدا که‌ ئایا تا چ راده‌یه‌ک له‌ناو خێزانه‌که‌تدا گرنگى به‌ ژینگه‌ ده‌ده‌ن؟
(38%) ده‌ڵێن تاڕاده‌یه‌ک، (58%) ده‌ڵێن زۆر و (4%)یش ده‌ڵێن که‌م.
پرسیاره‌کانیتریش به‌م شێوه‌یه‌ن:
ئایا ئاماده‌یى ئه‌وه‌ت هه‌یه‌ خۆڵى ماله‌که‌ت جیا بکه‌یته‌وه‌؟ به‌ڵێ (53%) نه‌خێر (36%) تاڕاده‌یه‌ک (11%).
ئایا تۆ ته‌نها ئاماده‌یت بێجگه‌ له‌ماڵه‌که‌ت شوێنى تریش پاک بکه‌یته‌وه‌؟ به‌ڵێ (72%)، نه‌خێر (28%).
پێتوایه‌ به‌پێى پێویست پارێزگارى له‌ژینگه‌ى کوردستان کراوه‌؟ تاڕاده‌یه‌کى که‌م (49%), که‌م (34%), زۆر (17%).
ئایا پێویسته‌ یاساى سزادان هه‌بیت له‌سه‌ر پیس بوونى ژینگه‌؟ به‌ڵێ‌ (97%)، نه‌خێر (3%).
ئایا به‌ڕاى تۆ لێدانى بیرى ئیرتیوازى کاریگه‌رى له‌سه‌ر ژینگه‌ هه‌یه‌؟ تاڕاده‌یه‌ک (48%), به‌ڵێ‌ (30%)، نه‌خێر (22%).
ئایا راگه‌یاندن به‌پێى پێویست بایه‌خى به‌ژینگه‌ داوه‌؟ نه‌خێر (54%), به‌ڵێ‌ (46%).
ئایا حکومه‌ت یان هاوڵاتى به‌رپرسن له‌ژینگه‌ى کوردستان؟ هه‌ر دوو لا (91%)، خه‌ڵک (5%), حکومه‌ت (4%).
ئایا پێت باشه‌ وانه‌ى ژینگه‌ بکریت به‌وانه‌یه‌کى سه‌ره‌کى له‌خوێندنگه‌کاندا؟ به‌ڵێ‌(81%)، نه‌خێر(19%).
ئایا رێکخراوه‌کانی بوارى ‌ژینگه‌ تا چ راده‌یه‌ک کاریگه‌ریان له‌سه‌ر ژینگه‌ هه‌یه‌؟ تاڕاده‌یه‌ک(41%), که‌م (29%), هیچ (17%), زۆر (13%).
به‌شدار بووانى ڕاپرسیه‌که‌ له‌ ڕه‌گه‌ز و ئاستى و ته‌مه‌نى جیاواز بوون: (72%) نێر و (28%) مێ‌.
ئاستى خوێندن: زانکۆ (65%)، دیپلۆم (12%), ئاماده‌یى (14%)، ناوه‌ندى(6%), سه‌ره‌تایى (2%)، نه‌خوێنده‌وار (1%).
ته‌مه‌ن: (18-25) به‌ رێژه‌ی (47%), (26-45) به‌ڕێژه‌ی (37%), (46 به‌ره‌وژور) (16%).
پرسی پیسبوونی ژینگه‌ و تێکچوونی هاوسه‌نگی ژینگه‌ پرسێکی جیهانیه‌وه‌ و له‌ ئێستادا هۆکاری سه‌ره‌کی زۆربوونی به‌شێکی زۆر له‌ نه‌خۆشیه‌کان ده‌گێڕنه‌وه‌ بۆ پیسبوونی ژینگه‌ و زیادبوونی به‌شێکی زۆر له‌ روداوه‌ سروشتیه‌کان له‌م چه‌ند ساڵه‌ی رابردووا وه‌ک به‌شێک له‌ ده‌رهاویشته‌کانی تێکچوونی هاوسه‌نگی ژینگه‌ لێکده‌ده‌نه‌وه‌ و هه‌موو ئه‌مانه‌ وا ده‌خوازێت مرۆڤه‌کان کۆتایی به‌و که‌مته‌رخه‌میه‌ی ئێستا بێنن له‌ به‌رامبه‌ر ژینگه‌دا و هه‌وڵه‌کانیان چڕ بکه‌نه‌وه‌ بۆ ئاشبوونه‌وه‌ له‌گه‌ڵیدا، که‌ دواجار به‌رهه‌می ژینگه‌یه‌کی باش هه‌ر بۆ خودی مرۆڤه‌کان و کۆمه‌ڵگای مرۆڤایه‌تی ده‌گه‌ڕێته‌وه‌.
وه‌ک له‌م راپۆرته‌شدا ئاماژه‌ی پێکراوه‌ به‌شێک له‌ ئه‌رکی ئاشتکردنه‌وه‌ی مرۆڤ و ژینگه‌ ده‌که‌وێته‌ ئه‌ستۆی سیستمی په‌روه‌رده‌ بۆ بردنه‌ سه‌ره‌وه‌ی رۆشنبیری تاکه‌کانی کۆمه‌ڵگا له‌ به‌رامبه‌ر چاره‌نوسی لێک‌دانه‌بڕاوی خۆیان ژینگه‌، ئه‌ویش به‌رێگای گونجاندنی وانه‌ی ژینگه‌پارێزی له‌ به‌رنامه‌ سه‌ره‌کییه‌کانی خوێندندا له‌ کوردستانیش.

چه‌تر ـ میدیا

لێدوانێك بنووسە