له‌ عیراق تاوه‌ره‌كان هیچ مه‌رجێكی ژینگه‌ییان تێدا نییه‌

ایلاف‌ - تاوه‌ره‌كانی په‌یوه‌ندیكردن له‌عیراق كێشه‌ی بۆ دانیشتوان و ژینگه‌ درووستكردووه‌، به‌هۆی ئه‌وه‌ی ئه‌و تاوه‌رانه‌ له‌سه‌ربانی ماڵه‌كان و دامه‌زراوه‌ حكومییه‌كاندا داده‌نرێن. (ئه‌حمه‌د سوڵتانی) رێگه‌یداوه‌ یه‌كێك له‌ كۆمپانیاكانی په‌یوه‌ندیكردن تاوه‌رێك له‌سه‌ر ماڵه‌ چوار قاته‌كه‌ی دابنێن له‌به‌رامبه‌ر (100) هه‌زار دیناری مانگانه‌و هه‌ندێك تایبه‌تمه‌ندیی له‌بواری په‌یوه‌ندییه‌ ته‌له‌فۆنییه‌كانی و كاره‌بایه‌كی به‌رده‌وام. به‌لام كاتێك كه‌ خه‌ڵكی پێیانوتووه‌ له‌رینه‌وه‌و شه‌پۆله‌ موگناتیسییه‌كانی له‌و تاوه‌رانه‌وه‌ درووست ده‌بن، ده‌بێته‌ هۆی نه‌خۆشییه‌كانی خوێن، تۆزێك سڵه‌میوه‌ته‌وه‌و دواتر له‌سه‌ر پێگه‌كانی ئینته‌رنێت بۆ زانیاری زیاتر ده‌رباره‌ی ئه‌م مه‌سه‌له‌یه‌ گه‌ڕاوه‌و بینیویه‌تی كه‌ قسه‌ی خه‌ڵكه‌كه‌ راسته‌.

مه‌ترسیی تاوه‌ره‌كان
توێژینه‌وه‌ پزیشكییه‌كان ئاماژه‌ به‌وه‌ ده‌ده‌ن شه‌پۆله‌كانی كارۆموگناتیسی كه‌ له‌و تاوه‌رانه‌وه‌ ده‌رده‌چن، ده‌بنه‌ هۆی جه‌ڵته‌كانی دڵ و مێشك و نه‌خۆشی شێرپه‌نجه‌. ئێستاش هاوولاتیانی عیراق زانیاری له‌سه‌ر مه‌ترسییه‌كانی ئه‌و تاوه‌رانه‌ی په‌یوه‌ندیكردن كۆده‌كه‌نه‌وه‌ كه‌ به‌شێوه‌یه‌كی هه‌ڕه‌مه‌كی له‌شارێكی وه‌كو به‌غدادی پایته‌خت و چه‌ند شارێكی تردا ده‌بینرێت. به‌پێی قسه‌ی پسپۆڕانی ژینگه‌و ته‌ندروستیش ئه‌و شه‌پۆلانه‌ی كه‌ ئه‌و تاوه‌رانه‌ درووستیده‌كه‌ن كار ده‌كاته‌ سه‌ر ته‌ندروستی مرۆڤ و ژینگه‌، به‌ تایبه‌ت هه‌ندێك له‌و تاوه‌رانه‌ له‌ڕووی ژینگه‌ییه‌وه‌ رێگه‌ پێدراو نین. له‌ زۆر پاریزگای عیراق و له‌وانه‌ش ناسرییه‌ فه‌رمانگه‌كانی ژینگه‌ به‌پێی به‌ندی چواری ماده‌ی (12)ی یاسای پاراستن و باشتركردنی ژینگه‌ كه‌ له‌ساڵی (1997)دا هه‌مواركراوه‌، داوایان له‌كۆمپانیاكانی په‌یوه‌ندیكردن و به‌تایبه‌ت كۆمپانیاكانی ته‌له‌فۆنی مۆبایل كردووه‌ بۆ ئه‌وه‌ی تاوه‌ره‌كانیان له‌ناو شاره‌كانه‌وه‌ بگوێزنه‌وه‌ بۆ ده‌ره‌وه‌ی ئه‌و شارانه‌، ئه‌مه‌ش بۆ پارێزگاریی له‌خه‌ڵك و ژینگه‌یه‌ له‌مه‌ترسییه‌كانی پیسبوونی ژینگه‌ به‌ هۆی مه‌ترسیی تیشكدانه‌وه‌كانه‌وه‌.

پاراستنی خه‌ڵك
له‌ولاتانی پێشكه‌وتووی جیهاندا ده‌بێت ئه‌و كۆمپانیایانه‌ به‌ر له‌دانانی تاوه‌ره‌كانیان له‌لایه‌ن ده‌زگا په‌یوه‌نداره‌كانی ژینگه‌وه‌ مۆڵه‌ت وه‌رگرن، چونكه‌ سنورێكی لانی كه‌می تیشكدانه‌وه‌ هه‌یه‌ كه‌ هیچ كۆمپانیایه‌ك نابێت ئه‌و سنوره‌ تێپه‌ڕێنێت. ئه‌مه‌ش به‌ مه‌به‌ستی پاراستنی خه‌ڵك و ژینگه‌یه‌ له‌هه‌ر ئه‌گه‌رێكی مه‌ترسیی ژینگه‌یی و ته‌ندروستی، به‌لام تا ئێستا نازانرێت داخۆ ئه‌و كۆمپانیایانه‌ی له‌ عیراق كارده‌كه‌ن ئه‌و مۆڵه‌ته‌یان وه‌رگرتووه‌ یان نا؟ به‌پێی سه‌رچاوه‌یه‌كی ره‌سمیی عیراق ته‌نها (1400) تاوه‌ر مۆڵه‌تی ژینگه‌ییان پێدراوه‌. زۆر جاریش كۆمپانیاكانی په‌یوه‌ندیكردن شوێنه‌ به‌رزه‌كان هه‌ڵده‌بژێرن بۆ ئه‌وه‌ی تاوه‌ره‌كانی لێدابنێن، به‌مه‌به‌ستی رووماڵكردنی ناوچه‌یه‌كی زۆرو باشتركردنی به‌ڕێوه‌چوونی خزمه‌تگوزارییه‌كانیان له‌ بواری په‌یوه‌ندیكردندا. پسپۆڕێكی دیكه‌ی ژینگه‌یی ئه‌وه‌ی خسته‌ڕوو كه‌ به‌ هۆی ناهۆشیاریی زۆربه‌ی هاوولاتیان و كه‌مده‌رامه‌تییان زۆرجار هاوولاتیان گوێ ناده‌نه‌ مه‌ترسییه‌ ته‌ندروستی و ژینگه‌ییه‌كان و قایل ده‌بن به‌دانانی ئه‌و تاوه‌رانه‌ له‌سه‌ر سه‌ربانی ماڵه‌كانیان. هه‌ندێك له‌ پزیشكه‌كانیش گومانی خۆیان له‌وه‌ ناشارنه‌وه‌ كه‌ ئه‌و تیشكه‌ی له‌و تاوه‌رانه‌وه‌ ده‌رده‌چن، ده‌بێته‌ هۆی چه‌ندین جۆری نه‌خۆشی شێرپه‌نجه‌، له‌وانه‌ش نه‌خۆشی شێرپه‌نجه‌ی خوێن (لوكیمیا)و كارده‌كاته‌ سه‌ر توانا ژیرییه‌كان و كاریگه‌ریشی هه‌یه‌ له‌سه‌ر توانای زاووزێكردن له‌ ژناندا

www.zhenga.net

لێدوانێك بنووسە